विश्वसाहित्य:
मार्टिजा लुजा क्यास्टिलो (पेरू)
मेरा कुरा गर
मेरा कुरा गर
र तिमीसम्म पुग्नका लागि हृदयले बनाउने
सबै चिनारीका कुरा गर।
त्यस नारीका बारे कुरा गर
र आँखालाई बुढ्याउने बाक्लो कुहिराको कुरा गर,
तर झलमलाइरहेको हृदयको कुरा नगर ।
जाऊ,
आफ्ना आँखाका नानी बिगार्ने
समुद्रका बारेमा भन,
ती समयका बारेमा भन
जतिबेला तातो बालुवा
ताजा काव्यमा परिणत भएथ्यो कलम भएर ।
बोल्न नसक्नेका रहरहरूका बारेमा
र देख्न नसक्नेका गोपनीय हेराइहरूका बारेका कुरा गर
भिजेको मनोहर आकाशबाट उत्पन्न
पानीका ससाना कणजस्तै छन्
जसको निश्वासको स्वच्छता ।
मेरो कुरा गर।
के मृत्युको फलाम र अपहरणको आगोले
मेरा ओठ बन्द भएको देखिरहेका छैनौ तिमी?
यस उज्यालाका बारेमा बोल
र तिम्रो निधारबाट देखिने
अँध्याराका बारेमा बोल
जसले कालो कात्रोले ढाकिरहेछ तिमीलाई ।
मानौँ,
शोक मनाइरहेका छन् क्षितिजहरू।
पुतलीहरूले लिएर आउँछन् बिहानलाई यहाँ
र कुनै पुरानो अपराध भएर जल्ने गर्छ सूर्यास्त।
मेरा कुरा गर,
तिम्रा विस्तारित गलाबाट
चिच्याउँछ दबिएको रोदन - जीवन!
समावेश हुनैपर्छ मैले
बतास र वर्षाहरूका माझ।
(मूल स्पेनिसबाट मार्गरेट स्येनले गरेको अङ्ग्रेजीबाट सुमन पोखरेलद्वारा अनुदित)
