कविता:
मञ्जुल
घर र बाटो
घर र बाटो
किन सँगसँगै हुन्छन् – प्रश्न उठ्छ मेरो मनमा
कि बाटो हुनु
घर नहुनु
कि घर हुनु
बाटो नहुनु
तर किन घर र बाटो सँगसँगै हुन्छन् ?
प्रश्न उठ्छ मेरो मनमा
घर हो बस्ने ठाउँ
बाटो हो जाने माध्यम
घर छोडेर जाने माध्यम
शायद नजाने गरी बस्ने घरै हुँदैन
शायद यही एउटा मात्र सत्य हो
जहाँ घर छ
त्यहाँ बाटो छ
बाटो नभएको घर मैले कहीँकतै देखिनँ
जब घरबाट बाटो टुट्छ
जीवन पनि टुट्छ
आजकल बुझ्दै छु
जीवन भनेकै बाटो भएको घर रहेछ
