• गृहपृष्ठ
• संस्थागत परिचय
• लिङ्क्स
• पूर्व अङ्कहरू
• सम्पर्क ठेगाना / पाठक प्रतिक्रिया

भीष्म उप्रेती

गाउँ

आँगनमा
करेसाबारीमा
खेतमा
फूलका बोटहरूमा
शीत खसेको छ भने सम्झनू
कतिपय कुराहरू ठिकठाक भइरहेका छैनन्
महिलाहरू रातभरि रोएका छन्
गाउँमा ।

आँगनमा
बारीका डिलमा
बाटोका छेउछाउमा
गमलाहरूमा समेत
रङ्गीचङ्गी फूलहरू फुलेका छन् भने सम्झनू
त्यस्तो नराम्रो केही भएको छैन
महिलाहरू दिलैदेखि मुस्कुराएका छन्
गाउँमा ।