बर्ष ७ / पूर्णाङक ७

Content on this page requires a newer version of Adobe Flash Player.

Get Adobe Flash player

सम्पादकीय:

तमसो मा ज्योतिर्गमय 

 

अचानक जिन्दगीको रफ्तारमा यात्रा ढलपल ढलपलजस्तो, कतै आनन्दमय जलविहार गर्दागर्दै तत्क्षण भुमरीमा नौका नै डुबेजस्तो, अझ भन्दा प्रलयको आँधीले सारा सृष्टि नै क्षतविक्षत पारेजस्तो गत वैशाख १२ को प्रात ११:५६ पछि समय नै स्थगित भएसरि हामीले भूकम्पीय महाअन्धकार झेल्यौँ, रुमल्लियौँ । हो, घण्टाघरको घडीको सुई पनि रोकियो, तर पनि समयको रफ्तार त रोकिएन ! जिन्दगीको रफ्तार पनि रोकिएन ! शून्यमा सृष्टि या सिर्जनाजस्तो टुहुराका आँखाले पनि सपना देख्न छाडेन, लाखौँ एकान्तमा झरेको आँसुको भेल जमेको पोखरीमा पनि कमल फुल्न छाडेन ! डराइरहेकी आमाको काखमा पनि बालक मुस्कुराउन छाडेन ! फेरि पनि घाम उदाइरह्यो / अस्ताइरह्यो । हरिया धानका बोटहरू पुन: लहराउन थाले । प्रकृतिको उही रफ्तारमा जताततै पुन: फूलको रौनक महकिएको छ । निश्चय नै हामी जीवनको शरणमा छौँ; अस्तित्वको शरणमा छौँ । यतिखेर उजाडमै बहारसरि या भनौँ घामपानीको आकाशमा इन्द्रेणीसरि उही प्रिय जीवन र अस्तित्वका नाममा नेपाली कलासाहित्य डट कम प्रतिष्ठानद्वारा अनुप्राणित डिजिटलमा विशुद्ध कलासाहित्यिक पत्रिका www.nepalkalasahitya.com को सातौँ अङ्क पुन: तपाईँको मनको दैलो ढकढक्याइ रहेछ ।

 

यथार्थत: आकाशमा कालोनीलो भएर बादल मडारिरहे पनि उज्यालो चाहमा कहाँ पूर्णविराम लाग्दोरहेछ र ! सहृदयले खोजिएको परम आनन्द र शान्तिको आभामा कहाँ ग्रहण लाग्दोरहेछ र ! आखिर पूर्ण जूनको उज्यालोको खोजी गर्दै अँध्यारोमै सही नेपाली कलासाहित्य डट कम प्रतिष्ठान दृढ स्तम्भित नै छ, र त चिरिएको विरूप आँगनले जिन्दगीलाई गिज्याइरहे पनि, धर्तीको मुलायम आवरण उप्किएको पहिरोको घाउले पीडा बल्झाइरहे पनि, आफ्नै हातको सरगमले सिर्जना गरेको न्यानो प्रियताको घर भत्किएको खण्डहरमा तत्क्षण सङ्गीतमा लहराउने आकाङ्क्षा आफ्नै आँखा अगाडि पुरिए पनि, हेर्दाहेर्दै सपना देख्ने आफ्नै आँखाको आँसुले बगाएका सपनाबिहीन शून्यताले डसिरहे पनि अर्थात् आज यो देश हजारौँ अन्धकारहरूबीच किंकर्तव्यविमूढ उभिए पनि एक झिल्को उज्यालो स्वरूप नेपाली अङ्ग्रेजी दुवै भर्सनमा पुन: www.nepalkalasahitya.com [www.nepaliartnliterature.com] को सातौँ अङ्क प्रतिष्ठान कलापारखीका उत्सुक संचेतनालाई सहर्ष समर्पण गर्दछ ।

 

असतो मा सद्गमय, तमसो मा ज्योतिर्गमय, मृत्योर्मा अमृतं गमय ।

 

सहयोगका लागि सबै सर्जक, अनुवादक, प्राविधिज्ञ एवं सहृदयी प्रियजनहरूलाई विशेष धन्यवाद !

 

जरुर अर्को अङ्कमा हाम्रो भेटको सौभाग्य जुर्ने नै छ भन्ने विश्वाससहित...

 

- मोमिला









अतिथि चित्रकार

प्रकृति आर्ट एण्ड क्राफ्ट्स

फोटो ग्यालरी

हाम्रा सम्मान र पुरस्कारको प्रोफाइल